الاثنين، 7 مارس 2011
اول مره دخلت علي السيت ده .. ف اخر اجازه الصيف الي فات .. وكان عشان انتمتي كانت عامله عليه .. وعجبتني فكرته ..و اول ما دخلت عليه كانت انتمتي الوحيده العربيه الي عندي كل الباقي كانوا اجانب و كنا علي طول انا - و انتمتي - بنكتب حاجات انجلش و نعمل ريتويت علي حاجات الاجانب و ماكنتش بعمل كده عشان عقده الخواجه -زي ما بيسميها البعض - انما عشان انا ماكونتش اعرف ان التويتر ليه غرض تاني غير ده ..
وكان ف الاول القعاد علي التويتر مش اساسي كل فين و فين بدخل عليه ..
بعد فتره نصحت بنات خالتي بيه .. و كده بقي عندي تلات مصريات عليه ..
وبعدين بدات الاقي ناس مصريين كتير .. بدأت اعمل فلو .. و بدات اكتب عربي عليه .. و بدأت اعمل -ان فلو - للاجانب ..
وبدأ يوسع النطاق .. لحد قبل الثوره بشهر كده كان كل الي عندي مصريين ..
لحد ما في يوم .. كان في مظاهره ما .. وكان في ولد عندي علي التويتر تحت ف المظاهره دي
وبدأ يكتب الاحداث لايف .. سعتها كان اول مره احس اني مع تحت ف مكان و انا ف الحقيقه قاعده ف البيت ..
بدأ اتحمس و احس بأحساس الولد ده .. وكاني معاهم .. وكان بيكتب انه اتفق مع صحابه الي يتمسك يقفل موبيله ..
ولما كتب فلان اتقفل موبيله .. اعد اعيط .. مع اني معرفش اي حد فيهم .. لكن من كتر احساسي اني معاهم ..
من يومها حسيت ان التويتر ده مهم جدا جدا .. وجميل كمان .. ..وبدأت احس بالمعني الحقيقي للتويتر
وبعدين جت احداث ثوره تونس .. ولقيت تفاعل رهيب من المصريين معاهم .. بدأت اتابع ..
و اتحمس و ادلي بأرائي كمان ..
وبعدها بدأ الكلام عن ثوره ف مصر يوم 25 .. ف الاول عارضت و قلت اكيد هتفشل عادي يعني زيها زي كل المظاهرات الي قبل كده
ناس هتنزل .. هيضربوهم .. و يعتقلوهم .. و بعدين يفرقوهم .. وخلاص !!
المهم جيه اليوم الموعود .. و انا محطش الموضوع ف بالي اصلا .. و رحت عند خالتي .. و مامتي اتصلت بيا قالت انها
مالقتش حد ف الشارع .. قلت لها شوفتي اي كلام ..
بعد الساعه 2 .. وده الزمن الي كان محدد للمظاهره و انا معرفش .. سمعنا ان الناس اتجمعت ف كذا مكان ..
سعتها فتحت التويتر و بدأت اتابع الناس و الضرب و كل الي بيحصل ..
وكانت بالنسبه لي لحظات جديده عليا جدا جدا .. و محمسه جدا :)
و توالت المتابعه - حتي يومنا هذا-
و ادركت ان التويتر ده موقع مهم جدا جدا ..- و بقيت بفتحه اول حاجه علي النت و قبل كل حاجه -
انا عشت كل تفاصيل الثوره من بيتي .. طبعا ده ما منعنيش اني انزل طبعا .. انما اللحظات الي بابايا العزيز منعني انزل فيها كنت بالفعل هناك من خلال التويتر ..
و بعدين اكتشفت حاجه مهمه جدا .. اظن ان اغلب الناس اكتشفوها .. هي ان فعلا اغلب الناس المحترمين .. الناس الجدعه .. الناس الي ارائها اغلبها صائب و فاهمين هما بيعلموا ايه .. كلهم علي التويتر .. لدرجه اني قلت انا اتظلمت كل سنين حياتي .. اني معملتش اكونت عليه من زمان ..
طبعا بقي هنغض البصر علي ان التويتر بعد ما اتشهر ف التلفزيون نص المصريين عملوا عليه .. مع جهلهم باستخدامه .. ده انا اخويا الصغير - 10 سنين - عمل عليه :D
و هنغض البصر علي اني اكتشفت او يعني اتصدمت ان في بنات كتييييييير جدا جدا .. بيشتموا شتايم والله الواحد بيتضايق اما بيسمعها ف الشارع .. ومش بنبقي كمان فاهمين معناها .. و عادي هما يشتموها عادي جدا
و كمان علي الناس الي بتبقي داخله تتشات او تتعارف .. ده مره واحد بعت لي ممكن نتعرف يا حلو .. :D
وشكله من ايام سعد زغلول اصلا .. :D
المهم المحصله .. اني بشكر الراجل صاحب فكره التويتر .. و بشكر انتمتي الي الهمتني اسجل فيه .. و بحيي كل الشباب الي عندي علي التويتر .. وبحيي مجهوداتهم .. و بناشد اي حد بيشتم يبطل عشان انت/ي ممكن تعبر عن وجه نظرك بكل احترام و توصل لنا برضه و نحسها ..
وبناشد اي حد داخل يتعرف ممكن يدخل علي اي سيت تاني و يسيب لنا التويتر نضيف :)
بس!!
0 Comments:
Subscribe to:
تعليقات الرسالة (Atom)
