الثلاثاء، 22 فبراير 2011

الوزاره الجديده

نبذه بسيطه عن الوزاره المصريه الجديده :

1
* اضغط علي الاسم ليظهر لك نبذه عن الشخص :)

القاهرة : أعلن الفقيه الدستورى المصري الدكتور يحيى الجمل الأحد أنه وافق على تولي منصب نائب رئيس الوزراء في حكومة أحمد شفيق

وأضاف الجمل في تصريحات لبرنامج "العاشرة مساء" على قناة "دريم" أنه قبل المنصب استجابة للواجب الوطنى وأن منصبه ليس شكلياً كما أنه شارك فى بعض الاتصالات لتشكيل الوزارة الجديدة

2-المهندس محمد الصاوى صاحب ساقية عبد المنعم الصاوى منصب وزير الثقافة



3-ومنير فخرى عبد النور وهو سكرتير عام حزب الوفد منصب وزير السياحة


4-الدكتور جودة عبد الخالق وهو خبير اقتصادى وقيادى بحزب التجمع منصب وزير التضامن والعدل الاجتماعى

5- جورجيت قلاينى نائبة مجلس الشعب السابقة وزيره وزارة الهجرة والمصريين فى الخارج


6- أحمد جمال الدين موسى أصبح وزيراً للتربية والتعليم والتعليم العالى


7-الدكتور عمرو عزت سلامة وزارة البحث العلمى

8-هانى سرى الدين وزارة التجارة


9-أحمد أبو الغيط وزير الخارجية


10-ممدوح مرعى وزير العدل

* اضغط علي الاسم ليظهر لك نبذه عن الشخص :)


الثلاثاء، 15 فبراير 2011

ائتلاف الحزب الشبابي

حزب ائتلاف الشباب المكون من وائل غنيم و صحابه الشباب ..

مبدأيا انتوا ناس محترمين جدا و انا بحترمكوا شخص شخص .. وانتوا - ومحدش يقدر ينكر - السبب الاكبر بعد- ربنا طبعا - في نجاح هذه الثوره وانتوا شراره البدايه .. =)

انما بصراحه بقي نفخناهم زياده انا لحد دلوقتي شفت يجي 6 لقاءات ليهم سوا وائل لوحده او وائل و هما او حد منهم مع حد تاني ..

وفيديو ليهم قاعدين بياكلو سوا و فيديو وهما بيحتفلو .. سوبر ستارز بقي ..!!

كده احنا بننسي حاجات مهمه جدا ..


ربـــنا .. الشباب التانيه الي نزلت المظاهرات .. الشهداء .. الناس الي باتت ف التحرير ..

كل دي عوامل لو ما كانتش موجوده ماكناش نجحنا و كان الحزب الائتلافي ده اتقبض عليه وراحوا ورا الشمس و لا حد سمع عنهم حاجه تاني ابدا ..

انا مش بقلل من مجهودهم العكس ده عليه عامل كبير .. بس تكبيرنا ليهم ده غلط احنا كده بننفخهم و كده هيحسوا انهم هما السبب ورا التغير و ربما يدخل الغرور الي نفوسهم .. وربما -مستقبليا - يتفلحسوا علينا .. زي واحد منهم امبارح كان علي المصريه بيقول :احنا لما فكرنا و خططنا و ...!! عاش يعني ف الدور :(

وكده كمان هننسي و هنجحد بجهود الناس التانيه ..

لو سمحتوا نداء الي كل البرامج الفضائيه بلاش نفخ ف الولاد عشان الي اصلا المفروض الي يستضافوا الناس الي باتوا ف الميدان .. و نامو ف العراء و البرد و الخوف ..

و بالذات الحاجه مني الشاذلي الي اكاد اقسم انها مش فاهمه ف الاعلام واهم حاجه عندها الظرف الي اخر الشهر من مدير القناه :@


الاثنين، 7 فبراير 2011

التحرير يوتوبيا مصر =)

امبارح الاحد 6-2-2011

((وبعد محاولات عده )) اخيرا نزلت ميدان التحرير .. لتشهد عيني علي اروع حدث شهدته خلال -20 عاما - .. و سوف تشهده - اطال الله عمري -

انا من اول ما بدات معالم الميدان تظهر .. وانا شايفه خليه نحل .. الكل بيشتغل مع بعضه .. في احترام و اخلاص و اتقان .. متناهي ..

اتفتشت 8 مرات .. وكل مره البنات كانوا بيعتذروا لي .. بحب و احترام مالوش حل ..
****

انا كنت ااما بسمع من اي حد مواصفات المكان .. كنت بقول (( مُبالغ )) .. انما اما رحت وشفت .. بجد عالم تاني ..
****

امبارح كان اول مره ليا .. اقف ف قداس من اوله لاخره .. وكل ما كان في مسيحي بيشفني واقفه كان بيبتسم لي ..فعلا حسيت بمعني كلمه -ايد واحده -
****

امبارح شفت بعيني و المسلمين بيصلوا المسيحي واقفين ساكتين عشان ما يشوشوش عليهم ..
****

شفت الناس من كل الطبقات و الاعمار وكل حاجه .. بتتعامل سوا الفرق بس .. لو بنت بيخلوكي ما تعمليش حاجات كتير ..-احتراما طبعا -
****
لاول مره ف حياتي - ال20 سنه برضه - .. انضف الشارع!!

اه نضفت الميدان .. وكل ما كنت بعدي من قدام حد كان بيعد يدعي لي كتير .. كانه جدي او جدتي =)

وكل الناس الي كانوا بينضفوا معايا .. كلهم من طبقات اكتر من المتوسط .. ومع ذلك لم يترددوا لحظه ف التنضيف وبكل فخر ..
****

انا طول عمري بحضر تجمعات لمصريين كتير .. سوا معرض الكتاب .. ولما اتجننت و رحت السيرك القومي ..او حتي ف حياتي اليوميه ف زحمه السير و الباصات ..

انما دي اول مره اكون في مكان ربما يضم علي الاقل 200 الف شخص ..

وما احسش للحظه اني مخنوقه .. و محصلش ان في واحد احتك بيا -رغم الزحام ده - بالعكس .. انا اول ما كنت اجي اعدي .. الاقي الف واحد يقول للي قدامي - حاسب يا عم -

****

الناس كلها كانت بتتكلم مع بعض .. كانهم صحاب من زمان ..- صداقه 30 سنه بقي -

****

ما شفتش خناقه واحده علي مدار اليوم او يعني الحبه الي اعدت فيهم - من 10 صباحا حتي 6 مساء-

****

شفت شعب بجد مختلف و مثقف و متعلم و محب و مخلص و ودود و كوميدي ..

كانهم اختاروا من كل مصر الناس الكويسه و حطوهم هناك ..

****

عرفت ان انا حياتي كلها كان حواليا ناس اي كلام .. لان كل الناس الي اعرفهم علي الفيس بوك والي هما عباره عن صحاب الطفوله ..المدرسه .. و الجامعه .. و الجيران ..
طلع 95 % .. منهم اي كلام

و الناس الي اعرفهم علي التويتر .. والي عمري ما شفتهم ف حياتي طلع 95 % منهم محترمين ..

عشان كده اما الاقي ناس كتير ف التحرير بالاحترام ده .. عرفت ان انا الي محطوطه ف مكان غلط ..

****
انا يمكن كلامي مش مرتب .. بس انا بحاول اكتب احساسي .. والي حاليا ملغبط جدا .. بسبب الحاجات الروعه دي الي ماكنتش متخيلاها ..

حاسه اني عرفت يعني كلمه عيشه ..

****

انا عاوزه اقول كمان للناس -الاغلبيه- الي قالوا كفايه بقي تخريب ف البلد - قصدهم شباب الميدان -

مش هقولهم زي ما كل الناس بتقول الي هو الرد التقليدي .. عمركوا شفتو ناس بتخرب بتنضف الميدان والخ ..

انما هقولهم .. من الحاجات الي الثوره دي ادتها لي .. انها فتحت عيني علي الناس الي حواليا ..

و خلتني اعرف ان ف المواقف دي الناس بتابان علي حقيقتها ..

عشان كده الناس بتوع الميدان بيتصرفوا بالاسلوب الجميل ده .. عشان هما معدنهم نضيف ..

انما الناس الي قاعدين ف البيت و بيتكلموا كلام هما مش فاهمين منه ولا حرف .. دول معدنهم ............

وضيعوا علي نفسهم - بدماغهم دي- حضور اعظم لحظه تاريخيه و معنويه و نفسيه ممكن تشهدها مصر - ع الاقل لحد ما القرن ده يخلص -

****

انا خلصت الكلام الي عندي .. عشان الباقي الي جوايا مش هعرف اعبر عنه بالكتابه ..

بس انا بجد بناشد كل واحد انه يستحمل ويجي علي مصلحته الشخصيه شويه مقابل اننا نثبت ونصر علي راينا .. عشان الي عملاناه ما يضعش .. دي قضيه عمرنا مش قضيه لحظه ..

حط نفسك لحظه مكان واحد اتقتل له واحد بيحبه .. مش هقولك حط نفسك مكان مامته او باباه عشان دول موقفهم اكبر من ان حد يتخيله ..

انما حط نفسك مكان صاحبه .. اخوه .. خطيبته .. اي حد قريب ليه .. وشوف

لو كان حصل وواحد كان السبب في قتل صاحبك كنت برضه هتقول : بس بقي كفايه ده ابونا و امنا؟؟؟

ولا كنت هتقول وحياه ربنا ما همشي من الميدان الا علي جثته؟؟؟!!!!

****
انا خلصت .. وياريت محدش يحط كومنت تحرق دمي .. عشان ما ادعيش ربنا يولع في دمكوا و نرتاح من السلبيه الي جواكوا دي ..


حاجه كمان .. اول مره ف حياتي .. احس اني مفيده واني شاركت ف حاجه ليها لزمه .. واول مره احس اني مش عاوزه اسافر برا البلد و اني عاوزه اموت علي ترابها - مع بابا حسني - :P

بكل اختصار .. التحرير ده يوتوبيا مصر =)


;;

Template by:
Free Blog Templates