داخل دهاليز عقلي.

الثلاثاء، 17 فبراير 2009

0 رايكمـ حقوق النشر محفوظه ل ¤¦¤Ebtehal ¤¦¤ في 12:15 م

عمر ما حد فكر اد ايه حياتنا تشبه لعبه snaks

هقول لكوا ازاي..

..بس الاول صلوا علي النبي..

..

________

1-في لعبه ((اسناكس))..الثعبان بيبدأ نونو و كل ما ياكل التفاحه دي بيبدأ حجمه يكبر..

-((الانسان)) بيبدأ نونو برده..ويعد كده حجمه بيبدأ يكبر..
________

2-سعات في اللعبه ((السناك)) بيخبط في نفسه و بالتالي بيخسر..يعني بيخسر بسبب نفسه..

-في حياتنا سعات كتير اوي ناس..بتخسر بأيديها..بتكون خسارتها بسبب نفسها..

_______

3-في اللعبه سعات بيكون قدامنا تفاحه بتجيب سكور عادي و تفاحه بتجيب سكور اعلي..فا نروح جري للاعلي فا نخبط و نموت..

-في حياتنا العاديه ده بينطبق علي المثل الي بيقول ((الطمع يقل ما جمع))

_______

4-في العبه مهما الثعبان جمع ((سكور ))عالي ومهما كبر..في الاخر بيخبط و يخسر..

-والانسان برده مهما عمل و جمع ..في الاخر بيموت..

______

5-في اللعبه اما ال((سناك)) بيموت بيتكب لنا game over
و بيتكتب لنا ((سكور))..

-برده اما الانسان بيموت و بيبقي game over

بتكتب له ((سكور))..او بمعني اصح.

.((بيتحاسب عن السكور الي جمعه طول حياته)).

0 رايكمـ حقوق النشر محفوظه ل ¤¦¤Ebtehal ¤¦¤ في 6:44 ص

عندي مشكله جامده جدا..

وهي ((الكسوف))..

بس مش الكسوف الي الناس عرفاه ده..الي هو مش متكلمه و خجوله و .. لا لا .. ده مش مشكلتي خالص..

العكس انا متكلمه و جريئه و اجتماعيه يعني مش بتكسف بسرعه..

انما الكسوف الي بتكلم عنه.. هو اني مثلا بتكسف اغني قدام حد..

ممكن يبقي صوتي وهمي.. اجي اغني قدام حد تلاقيه باظ

مثلا طول عمري بتكلم انجلش كويس جدا زي اهل البلد بالزبط..

واجي برده اتكلم قدام صحبتي الانتيم يعني مافيش اي كسوف ده البنت عايشت معايا و شفتني بكل صوري و حالاتي..

وبرده اتلعثم ..

ده انا كنت بكتب حلو في النوته بتاعتي اما بدأت اكتب علي البلوج.. بدأ مستوايا الكتابي ينخفض.. عشان بس في ناس بتقرأها..

طيب اعمل ايه بقي في المشكله دي..؟؟؟ حد عنده حل؟

الاثنين، 16 فبراير 2009

شبح التكرار يطاردني...

2 رايكمـ حقوق النشر محفوظه ل ¤¦¤Ebtehal ¤¦¤ في 10:01 ص

اصبح الملل و التكرا و ((الروتين))..جزءا لا يتجز من يومي..

حيث اصبحت تقريبا اله اعمل متكرره يوميا..

واليكم يومي بالتفصيل الملل..

استيقظ في الصباح علي صوت امي قائله((اصحي بقي عشان الوقت اتاخر ايه كل النوم ده..))

افيق عند سماعي هذه الكلمات.. و استغرق ما يقارب من خمس دقائق حتي اقم من سريري,,

ودائما اتوجه للمرأه لاجدني اكاد اشبه الموتي الاحياء((الزومبي))..

اتوجه مباشره للحمام و علي كتفي ((فوطتي)) الخاصه.. و امسك ب((غسول يومي للوجه))..اوهم نفسي انه سوف يصلح وجهي في يوم من الايام..

ادخل و اغلق الباب...((قال يعني هيشوفوا الامله))..

انظر نظره بائسه لنفسي في المراه((يادي النيله وشي بقي ابشع من امبارح,, شكل الغسول ده مش بيعمل حاجه..))

بعد عده دقائق من مشاهده وجهي((الجميل جدا)).. انزل فرشاه اسناني من وسط اخواتها الفرش.. و اشعر و كانها تقول لي((مش كل يوم حرام بقي)),,

لكني اترك شعوري جانبا..و اضع عليها المعجون ثم ابدأ في غسيل اسناني.. و بعد ذلك اغسل الفرشاه جيدا..و التي دائما يكون المعجون ملصق بيها كانه لا يريد ان يتركها..

ثم اضعها في مكانها مره اخري..ودائما يسقط الكوب و ما به من فرش فاقوم بجمعهم مره اخري و اعيدهم في مكانهم..دائما يحدث هذا حتي عندما اضعها برفق.. احيانا يخرج الامر عن سيطرتي عندما اكون متأخره...

وبعد ذلك اجلب الغسول..وابدء بوضعه علي وجهي((الجميل جدا)).. ثم انظر لنفسي و هو علي وجهي ..ابدو مثل شبح هتلر ..

اوووووف اعوذ بالله.. ثم اغسل الكريم و اجفف وجهي..وانظر لنفسي لاري الفرق..((واو مشاء الله بقي ابشع)) ..

لا يهم.. ثم اخرج .. لاري ماذا يحدث في الخارج..اجد امي تتحدث هاتفيا ((غالبا)).. او تجلس علي الحاسوب((الكومبيوتر يعني))

و في كلا الحالتين .. اتركها متوجها لعالمي الثاني و هو ((النت))..

اجلس اتصفح النت سعات و سعات.. و اقلب هذا..و اشاهد هذا.. هكذا و تمر الساعات .. حتي معاد الغذاء..

التف مع اسرتي حول الطاوله((السفره يعني))..و نبدأ في الاكل صامتين.. حتي يبدأ احد الشجار مع الاخر فا يوبخه ابي.. او يبدأ احدنا بقص شيء حدث له خلال اليوم.. و غالبا رغم اني لم اخرج من البيت الا اني دائما اكثرهم كلاما..

ثم ننهي الاكل و يذهب كل واحد لمتابعه مذاكرته..واذهب انا لاتابع ((النت)).. ويمر الوقت مره اخري و يمر..يمر..يمر يمر يمر..

ثم اجد نفسي بدأت رؤيتي تتلاشي.. ولا عجب..فا الساعه اصبحت ال3 بعد منتصف اليل..

هاااااااو...

حسنا سوف اذهب للسرير.. و بعد هذه الجمله اجلس ما يقارب من ساعه او اكثر .. تحت مسمي ((بقفل حاجتي عشان انام ))..

وبعدما تصبح عيني شبه مغلقه..و اجد ان الجلوس علي النت بعينين مغلقتين ليس مجديا..

حسنا اغلق الجهاز..

واسير في الظلام((اه معلش نسيت اقول لكوا انهم كلهم ناموا))

اذهب لحجرتي و اسير هامسه حتي لا تستيقظ اختي..

ثم ابدأ في تمشيط شعري.. فا تستيقظ اختي علي صوت الفرشاااه و هي تمر خلال شعري..((معلش حساسه البنت))

فتقوم بصيااااااااح((بطلي الصوت ده الله..))

ثم تعود لتستأنف نومها مجددا..

و ادخل انا الي السرير.. و اضع سمعات الموبيل في اذني((مش بحب انام الا علي موسيقي خفيفه))..

و تبدأ ذكرياتي تعرض امامي علي انغام الموسيقي..

ثم اشعر بالتعب الشديد((ما انا عاوزه انام من تلات سعات بقي))

اقوم بغلق ((موبيلي)).. ثم اضع راسي علي وسادتي المريحه.. و تبدأ روحي بالتحليق في سماء الغرفه..

_____________

ثم .. استيقظ علي صوت امي... وهكذا..........

الم اقل لكم ان حياتي لا تخلو من الملل..

الأحد، 15 فبراير 2009

0 رايكمـ حقوق النشر محفوظه ل ¤¦¤Ebtehal ¤¦¤ في 4:57 م

بقيت بقايا انسان..ومحدش فاهم..!!

مش عارفه ليه

يمكن مش باين عليا..!!!

0 رايكمـ حقوق النشر محفوظه ل ¤¦¤Ebtehal ¤¦¤ في 2:34 م

دايما غزه تتضرب من هنا..!!

والاقي كل الناس حاطين الصوره دي ..

في توقيع في منتدي.. في بروفيل في فيس بوك.. صوره ماسنجر..

اي حته..المهم بيحطوها..

طبعا قبل التعديل الي انا حطيته كان مكتوب بدل ((egypt))

كان مكتوب ..غزه..

كنت بستغرب اوي من حاجتين هما موضوع البوست ده..

اول حاجه((ودي مهمه اوي)): ان الواحد من الناس دول يسمع الخبر من هنا..يجري ع النت و يحط الصوره..وخلاص كده هو عداه العيب و الراجل متضامن مع القضيه الفلسطينيه..

ومجاهد رقم واحد .. وميه ميه..

و طبعا مش هنسي الشال الفلسطيني المميز..الاسود في ابيض..((رغم اني كنت عاوزه اعمل له بوست لوحد))

لكن بما اننا بندردش في الموضوع ده يبقي نتكلم عن كله..

نرجع لموضوع الشال..

برده نفس نوعيه الناس الي بتحط الصوره دي..

في ناس نفس النظام بس علي الشال بقي..

والشال اسخف بكتير..

عشان ممكن و دي شفتها بام عيني كتير...بنوته سوري يعني((ماتسواش اي حاجه)) وتلاقيها لبسه و مش لبسه..وفي الاخر حاطه لي

الشال الفلسطيني علي رقبتها..كده يعني خلاص ده اخرها..اومال يعني يا ((حغام)) هتحارب ولا ايه؟؟

وبرده تلاقي واد ماشي جنب بنات الارض و السجاير في ايده و ..مش عارف ايه..والشال علي رقبته ..اصل توتو متأثر بالاحداث اوي..

صوعب عليه ان في فلسطين معندهمش ماكدونالدز..اصله بيبدأ يومه بفطار ماكدونالدز..فا حس بالمعاناه فلبس الشال تضادمنا معهم..

وطبعا الموضوع ده مش محتاجين نتكلم فيه اكتر من كده..عشان اعتقد ان رسالتي وصلت ..

الحاجه التانيه بقي((ودي الاهم)):ان الناس نسيت ان الصوره دي بجد فعلا مكان غزه لازم لازم يبقي..مصــــــــر..

اه والله مصر..

لما تبقي كل حاجه بتغلي من غير اي حدود ولا دستور كده..يبقي مصر محتاجه صوتك..

لما تبقي المعكسات حتي جوا باب الجامعه..يبقي مصر محتاجه((اعتقد اكتر من صوتك بكتير ))

لما تبقي الرزيله منتشره..لما الناس مش لقيه اكل..لما..لما..

اعتقد كل ده بجد محتاج صوتك...

كل ده محتاج بس..لا تطلع من قلبك..وفي وقت صح لمسؤل ..

والله مصر محتاجه بس..صوتك..

مش محتاجه سكوتك..

السبت، 14 فبراير 2009

0 رايكمـ حقوق النشر محفوظه ل ¤¦¤Ebtehal ¤¦¤ في 3:00 م

عمر ما حد فكر اد ايه ان الThird choice...ده شيء مهم في حياتنا..!!

لكن هو للاسف مش موجود

محدش طبعا فكر ايه هو الاختيار التالت..وهو ليه مهم..

ببساطه يا ساده ممكن اوضح لكوا ايه هو..!!

بصوا بقي..تعالوا نفتكر موقف كده عادي جدا بيجري لاي حد..ومنه نقدر نحدد مفهوم الاختيار التالت..

مثلا واحد يستلف من ابن خالته 3 جنيه..ماشي.. بصوا ده موقف عادي لكن الموقف ده ليه اختيارين بس..

الاول:يرجع ال3 جنيه..وهيلاقي ابن خالته يقول له:يا راجل عيب ترجع ايه بس دول 3 جنيه واحنا مافيش بنا الكلام ده..

التاني:انه يقول ده ابن خالتي و عيب مافيش بنا الكلام ده..وهتلاقي ابن خالته في نفسه هيقول :والله ما مسلف الواد ده حاجه تاني ده اكل عليا فلوسي..

طيب بالله عليكوا فين الاختيار التالت..؟؟ يعني نعمل ايه عشان الاخ ابن خالته يرضي؟؟

طيب مثال تاني عشان الي مافهمش من اول مره..

لو مره واحد معرفهوش عمل لي خدمه كده لله في لله..برده هيبقي ادامي اختيارين..

الاول:اشكره وهيعد يقول لي دي حاجه بسيطه و بلاش شكر ومش عارف ايه

التاني:ما اشكرهوش عشان هي حاجه بسيطه و مش عارف ايه..وهيقول سعتها..بنت قليله الذوق انا مش مجبر اعمل لها حاجه بعملها من نفسي و لا هان عليها تقول شكرا حتي

طيب بالله عليك نعمل ايييييييييييييه

هو ده الي بتكلم عنه..حياتنا ناقص لها الاختيار التالت..والله لوو بقي فيها هتلاقي حاجات كتير اتحلت..

بجد دوروا في حياتكم و المواقف الي بتعدي عليكوا هتلاقوا كلامي صح..

يعني بدل ما يبقي الواحد لازم يختار بين حاجتين .. لا ممكن يختار بين تلاته..

وغالبا التالت هو الي هيكون مناسب..

بدل ما نختار بين اننا نخسر حد.. او نخسر اخلاقنا..ممكن نختار احنا نحتفظ بالحد ده مع اخلاقنا..((اوعي جديد الاختيار ده))