الجمعة، 1 أبريل 2011
اليوم حصل لي حاجه غريبه اول مره تحصل لي من 20 سنه ..المكان : ميدان التحرير
الزمان : الساعه 3:30
الحاله العامه : الدنيا حر ولعه .. زحام مش كتير - اعدت ف زحام اكتر منه مرات كتيره - .. ناس بتشرب سجاير بالهبل ..
الي حصل كالتالي : فجأه كنت واقفه حسيت ان ضربات قلبي زادت و فجاه حسيت ان روحي بتتسحب من عيوني وبقيت مش شايفه كويس
والالوان بقت بتنور و نظري بينبض وحاسه اني هقع علي الارض ..
كان بيغمي عليا يا حضرات .. O_o
مع العلم اني اكلت قبل ما انزل ومش اول مره اقف ف الحر و لا الزحام .. - علي الاقل ده مش زي زحام و لا حر مكه-
انما الاختراع الملعون الي اسمه سجاير هو الي كان هيبوظ لي يومي النهارده :@
انا مش عارفه الناس الي بتشرب سجاير دي .. معندهاش حاجه اسمها ما اشربش سجاير ف مكان زحمه؟؟
يا سيدي حتي عشان الاطفال الي هناك ..
بلاش الاطفال و الدخان ..
طب حتي عشان السجاير ما تلسعناش .. انا مره كنت ماشيه علي رصيف وواحد بيحرك ايده بالسجاير لسعني ف ايدي
وقالي سوري O_o
استفدت انا ؟؟
ولو كانت جت ف عيوني يعني كان قالي سوري برضه؟؟؟
الفكره يعني .. لو حضرتك رجل لا تستطيع الاستغناء عن السجاير و عادي عاوز تموت نفسك .. محدش منعك انت حر جدا ..
لكن انت حر مالم تضر ..
اشربها بعيد عننا .. موت نفسك ف مكان اخر ..
اطلع برا الميدان اشرب و ارجع تاني .. و هنقولك ايه الي فاتك لو يعني خايف حاجه تفوتك ..
انما الي بيجري ده كتير و الله ..
انا عن نفسي مش مسامحه اي واحد ظلمني و شرب سجاير و لوث لي رئتي من غير حتي ما يستاذني انه يلوثها لي ..
و ده تعدي علي ملكيات الافراد الخاصه .. و ظلم .. وانا مظلومه و دعوتي مستجابه وهدعي و اقول :
ربنا يهدي شباب المسلمين .. بس
و الهتاف الجديد :الشعب الثائر ما بيشربش سجائر ..
اضافه للبوست :
لو كنا نخاف على وطنا كنا نعلم كم المليارات التى تنفق سنويا على السجائر
والمليارات التى تنفق فى معالجه اضرارها الصحيه
والمليارات التى نخسرها بسبب شبابنا المتوفى مبكرا وهو احد اهم اركان الاقتصاد والانتاج و النجاح
وامانه الله فى الدنيا التى نلوثها ونلوث امانه الله لنا فى الارض
0 Comments:
Subscribe to:
تعليقات الرسالة (Atom)
