الأحد، 13 مايو 2012
عشان ترتاح :
بطل تبص حواليك .
بطل مقارنه .
بطل تضحك علي نفسك . بقي شكلك وحش قدامك .
بطل تنتقد في نفسك ليل نهار ، شجعك ولو مره .
بطل تهتم تقول للناس "تصبحوا ع خير " ـ مش مهم حد يصبح حتي .
بطل تستني ــ الي يتأخر هيفوتك وهو وحده الـ"خسران" .
بطل تأول كل حاجه علي انها إشاره كونيه ــ الاشارات للاغبياء "فقط".
بطل اما تصحي تستني حد يقولك " صباح الخير " وافتكر انك الخير للكل صباح ــ
ده هيخليك تضحك عليك شويه .
بطل كل ما تكلم حد تطبطب عليه بسبب ومن غير سبب ، وافتكر انك لو بتموت
الناس دي مش هتعبرك .
بطل تفكر ـ كل ما مخك يبدأ يشتغل افتكر ايموشن " اساحبي " و قول ييع بسرعه و
كشر هتلاقي نفسك ضحكت ونسيت التفكير .
بطل تهرج مع الناس ،، هرج عليهم وبص علي ملامحهم و هما مستغربينك و
سخسخ عليهم .
بطل تعيش كـ أنسان ،، عيش كملك و امشي فارد ضهر و علي وشك نظره قنعره و
بص للناس من فوق لتحت .
بطل تمشي ع الرصيف ــ امشي بين العربيات و قولهم هو انا مش من حقي امشي
ف الشارع .
بطل تقفل الشباك وانت نايم ،، افتحه مره و خلي الشمس تدخل الاوضه و اقنع
نفسك انك نايم ف الغابه .
بطل تبقي شخص لكل المواقف ،، ومره حد يتصل بيك و هو بيصوت و عاوزك
قوله ببرود انا مكسل انزل و اقفل .في احتمالات كتيره انه هيموت محروق .
بطل تستخبي من اشعه الشمس الحارقه بص للشمس بتحدي وقولها انتي عشان
ضعيفه بتحرقيني وانتي بعيده .
بطل تتجاهل الحيوانات ، مره وانت ماشي قول للقطط صباح الخير او ازيكو والله
بتفرق و بترفع روحك المعنويه .
بطل تتعامل مع الجماد انهم مش بيحسوا ، عاملهم علي انهم بيحسوا و هتلاقي بقي
عندك صحاب كتير حواليك وطول الوقت .
بطل تبقي عاوز - حد - لان ده احياناً بيخليك تتورط ف ناس انت بتكرهها .
بطل تبقي سلبي ، امشي بورقه و قلم واكتب مسج لطيف لاي حد متعرفهوش و
اديهوله بس بلاش الجنس الاخر لحسن تتفهم غلط .;)
بطل تبقي مالكش لزمه امشي مكشر ف الشارع و اي حد يكلمك زعق من غير اي
سبب و ف الاخر قولهم اصل انا عسكري ــ خليهم يكرهوا العساكر .
بطل تبقي مراعي للي حواليك ، ومره وانت ماشي جمب حد ف حاله كح بصوت
عالي جدا و خضه .
بطل تبقي خواف ، مره اركب باص انت مش عارف هو رايح فين و انزل ف اكتر
مكان غريب عليك وافتح دراعك و قول واحشني يا اهل منطقتي .
بطل تبقي كويس ـ اي حد يطلب منك اي طلب ف اي وقت خليك صادم و قول "لا"
بلا اي تردد و بسرعه و بقسوه و بعدين اضحك علي ملامح وشه .
بطل تبقي صامت ـ طول ما انت ماشي ف اي مكان عد اي حاجه حواليك بصوت
عالي و ازعج الناس بالارقام والي يعترض ابدأ من الاول .
بس ودعي لي :D
;;
Subscribe to:
الرسائل (Atom)
