السبت، 29 أكتوبر 2011

وانا يوم ما سامحت ،، ما سامحتش عشان تستاهل ،، انما سامحت عشان القلب الي مش بيسامح بيعيش لوحده بقيت عمره ،، بس !

الجمعة، 21 أكتوبر 2011

قررت رحيل(ها)

خلاص ــ
همشي م الكوكب ،، همشي ،، و هلاقي كائنات تانيه شكلها مش ادمي ،، بس جواها كل شيء ادمي ،، و هيبقي عندهم عين واحده بس هيشوفوني كويس ،، و بوقين بس هيسيبوني اتكلم و هيسكتوا ،، وودن واحده و برضه هيسمعوني بيها كويس اوي و مش هيسكتوني ،،

هعد احكي لهم حاجات مش هيصدقوا ان في ناس كده ،، و هيعرفوا انهم في نعمه و ان اهل الارض دول هما الي مخلوقات فضائيه معجنه غريبه و غلسه !

مش هيبقي في جاذبيه هبقي متحرره من قيد الجاذبيه ،، و ثقلها !

هصحي الصبح هلاقي واحد فيهم فضائي ،، هقوله صباح الخير ،، هيقولي صباح النور ،، فا يومي هيتفتح ،، هو فوق في شمس صحيح ؟!


مش مهم اكيد هما بيعلموا الصبح بحاجه ،،


اول ما اصحي يقولي حلمتي بأيه ــ اعد اتكلم ببطءو اسرح و افتكر وااحكي ،، ماهو الكائن مش هيزهق مني ،،


وبعدها ياخد رايي في كل حاجه حوالينا ،، بدأ من الشمس - لو في - نهايه بالي هنتعشي بيه - برضه لو في - ، هقول رايي بكل حريه و هعد ارغي و اعيد و ازيد ف الكلام ،،


وهعد انط م الفرحه اني برغي من غير حدود ،، و هبقي متحمسه و صوتي هيعلي ،، بس مش مهم ده الكوكب ده ،، مافيش حدود للصوت ،،،


هضحك جامد اوي ،، اصلي سعات اما بضحك الناس بتقولي يا اوفر ،، بس الكائنات مش بيفرق معاها ــ علي فكره الضحك عندهم ثقافه كمان ،،


هيبقي في تفاهم ومحدش منهم هيفهمني غلط ،، يعني اما اقول كلمه حب محدش فيهم هيجي ف باله علي طول ولد و بنت ،، لان مش ده الحب الوحيد الموجود انما ده جزء ضئيل جدا من الكلمه دي ،،


واما اقول نفسي احضن حد مش هيقولوا عليا مش كويسه ،، عشان اكيد انا قصدي احضن اي حد مش لازم ولد وفي حالتي اكيد مش ولد ،،


علي فكره علميا الواحد بيحتاج 5 احضان يوميا عشان ينمو ! ،، طبعا مش عاوزه اي استظراف و امخاخ تروح بعيد عشان مش انا يعني الي هكتب حاجات غلط ماشي ،،
ممكن حضن عائلي ،، او امومي ،، او صداقي ،،

وده ميزه ف الكائنات دي مش بيفهموا غلط ،، هقول للكائن ده انا نفسي في حضن هيبص لي بصه شفقه اقوله اه نفسي في 30 حضن كمان ،، فا ينادي كائنه بنت تحضني عشان انمو و اعيش و احس بالامان ،، برضه العيش في كوكب من غير جاذبيه اكيد نقصه امان ،،


الكائنات دي برضه ميزتها متعرفش تجرح ،، لو عملت اي حاجه وحشه محدش هيقولك كلام جارح اهوج من غير تفكير ،، براحه و بتفاهم هيقولوا لك كذا غلط عشان كذا ،، كان المفروض تعمل كذا و براحه جدا ،، هتلاقي نفسك غصب عنك اعتذرت و صلحت غلطك و مش هتعمله تاني و هتبقي مبسوط كمان ،، مش زي ناس تانيه الدنيا عندهم اي كلام ف اي وقت لاي حد مش مهم !!


الكائنات دي صادقه جدا ،، مش بيكذبوا و ده بيخلي الكوكب عندهم كل الناس بتثق في كل الناس ،،


و مش بيسيبوا بعض ،، عمرك ما هتتعلق بحد ويمشي و يسيبك عمر عمر !!! بيفضلوا سوا جمب بعض محدش بيسيب التاني لاي سبب ،، مافيش عندهم اسباب تؤدي للفراق اصلا !!


مافيش عندهم حزن ،، لو حد كشر بعد كل المثاليه الي بتحصل دي ، بيلاقي الناس الي حلفت يوم انهم هيبقوا معاه ،، بيلاقيهوم حواليه و يحاولوا يخلوه بضحك و ينبسط ،، حتي لو معرفوش ،، هو من نفسه هيضحك و هينبسط ان في ناس روعه كده بيحاولوا يسعدوه ،،


محدش فيهم بيبص للتاني علي انه اقل منه ف حاجه ،، محدش أحسن من حد ،، لو حد لقي حد اصغر منه وتايهه في الدنيا ،، بيقف جمبه و يحتويه و يعمله و يساعده لحد ما يقف علي رجله ،، و التاني بيبقي عنده رد جميل،، و بيساعد التاني لما الدنيا تهلكه و يبقي محتاج حد يشيل له شنطه بس !


وطبعا محدش فيهم بيحس بالوحده عشان الناس كلها سوا ،، الناس بتسأل عن بعض ،، أحيانا الواحد بيبقي محتاج حد يقوله بس ازيك !!


والله أزيك بس ممكن تغير مود أسبوع بحاله ،،


و مافيش شتايم طبعا و لا صوت عالي الا لو صوت عالي بفرحه او تحمس ،، انما خناق لا ،،


ومافيش معكسات ،، بقولكوا مش بيفهموا بعض غلط ،،


وكل الكائنات بتخاف علي بعض ،، و تحتوي بعض ــ و بتطبطب علي بعض ،،


محدش بيسرق و لا بيغش ولا بيبلطج ،،


كله احتواء انتماء حنان حب صداقه مساعده
عطف اشفاق تدليل ،، المعاني الي اهل الارض نسيوها من زماان ،،

بس ،، طبعا ده كوكب هسميه ،، أبتهالو ،، وهيبقي في مجره غير درب التبانه دي خالص ،، و هعيش مع كائنات نضيفه بقي عشان تعبت ،،،


وعلي راي عمر طاهر الارضي : انا كوكب ماشي لوحده ومافيش للوحده حدود !!



الاثنين، 10 أكتوبر 2011

حته من قلبي لوحدي :))





كنت عاوزه اقولك بس اني بجد بحسد نفسي ان اعرفك ، و انك اقرب صحابي ،، واني ببقي ف اسعد لحظات حياتي و انا قاعده معاكي ،،

وكل حاجه يتحكيها حصلت لك ،، انا بحس انها حصلت لي بالزبط ،، و ديما من قلبي بدعي اني اشوفك بتضحكي علي طول و بعد ارقيكي في سري كل ما اشوفك عشان بخاف عليكي حد يحسدك ،،

وده الي خلاني ازعق لك اما حطيتي صوره ابنك ع النت ــ عشان خفت يحصل لك حاجه و نتألم احنا الاتنين ــ

بس النهارده اما كنتي بتتكلمي معايا ،، و جات فكره سفرك تاني ــ مع اني عارفه انه هيحصل الا اني حزنت اوي جوايا ــ و حته من قلبي وجعتني جدا ، واما قلتي لي ان مامتك مش حابه السفر كنت عاوزه اعيط بأعلي صوتي و اقولك وانا كمان ،، بس خفت تحسبيني لسه صغيره و اتكسفت من نفسي اوي اني اعمل كده ،،

مش متخيله انه ممكن يجي يوم توحشيني ومعرفش اروح اشوفك ،، او يحصل لي اي تطورات ف حياتي و ما تبقيش موجوده ،،

وازاي اول بيبي هيقولي يا خالتو هيكبر بعيد عني ،، وازاي مش هبقي موجوده في اول لحظه يقول فيها اسمي قدامي ،،

وازاي مش هتجري تتصلي بيا عشان اجي اشوفه و هو بينطقه ،، ومش هنعمل شوبينج بيه زي ما كنا بنحلم ؟؟

ومش هنخلف سوا في يوم واحد عشان ولادنا يبقوا صحاب زينا زي ما حلمنا ؟؟

طيب ولما اروح مكان فيه زمايلنا بتوع الدراسه مش هلاقي اختي الكبيره الي بحب ادخل ماسكه اديها واحس اني صغيره جمبها و اني جايه معاها حتي مع اني بعرف اروح كل حته ف الدنيا دي لوحدي ؟؟

ومين هيضحك معايا علي حاجات غريبه مش بتضحك ،،

ومين هيفهم الكلمات الغريبه الي انتي بتعبري بيها عن حاجات مالهاش علاقه بالكلمات دي ،، و كل الناس يبقي حوليها الف علامه استفهام و انا الوحيده الي افهمك و الاقيكي تقولي لهم هي فهمتني بكل فخر ؟

ولما تمشي مين الي هيديني من خبراته زي ما بتعملي ،، انتي الوحيده - غير مامتي - الي اما بكون معاها بتعد تشرح لي كل شيء جديد عليا عشان تعلمني ،، من الطبيخ ،، للحمل ،، و حتي حما البيبي ،،

ومين الي بلاقي منها اصدق تعبيرات ،، ومين الي بجد معاها بحس اني الي بتعبه و بعملهولها - بيطمر - وبلاقي منك رد فعل جميل يرضي غروري كانسان ،،


انتي مش متخيله بعدك انا دنيتي هتنقص حته جميله اوي ،، زي ما نقصت اما كنا في ثانوي ،،

و هفضل طول عمري اما اعدي من عند بيتك - الي كده كده ف كل مشاويري بعدي عليه - هفتكرك و هتالم اوي اوي ،، وممكن اعيط كمان ،،

انا نفسي انك تسافري طبعا عشان بس بحب اشوفك مرتاحه ،، و عشان نفسي تبقي مبسوطه انتي و اسرتك الصغيره ،، بس بجد هبقي تعيسه اوي من غيرك ،،

عامه طبعا ف الاول و ف الاخر ده قرارك انتي و شريك حياتك - جوزك يعني و بلاش دراما رخيصه مني - :D

والي هيتعمل انا راضيه بيه عشان دي في الاول والاخر حياتكوا انتوا ،،

بس بجد كان نفسي نفضل صحاب لحد ما نعجز سوا و نكبر سوا ونقول يااااه من 50 سنه اتقابلنا =))))))))

;;

Template by:
Free Blog Templates